राजिया रे दूहा सारु http://rajiaduha.blogspot.com क्लिक करावें रज़वाड़ी टेम री ठावकी ख्यातां रो ब्लॉग आपरै सांमै थोड़ाक टेम मा आरीयो है वाट जोवताईज रौ।

रण देवी "हाडी" राणी री

Rao GumanSingh Guman singh


सेनाण पड्यो  हथलेवा  रो 
हिंगलू  माथे  पर  दमके  ही 
रखडी  फेरां री आन  लियां 
गम  गमाट करती  गमके  ही 

कांगण डोरों  पूंचा मांही 
चुडलो  सुहाग  ले  सुघडाई 
मेहंदी  रो  रंग  ना  छूट्यो हो 
थाव  बंध्या  रह्या  बिछियाँ  तांई 

अरमान  सुहागरात  रा  ले 
राजपूतण   महलां  में  आयी 
ठुमका  स्यूं  ठुमक - ठुमक  करती 
चढ्गी महलां  में  शरमाई   

पोढ़ण  री  अमर  लियां  आशा 
प्यासा  नैणा  में  लियां  हैत
चुडावत गंठजोड़ो  खोल्यो 
तन  मन  री   सुध  अमिट मेट 

पण  बाज  रही  थी  शहनाई 
महलां  में  गूंज्यो  शंखनाद 
अधरां  पर  अधर  झुक्या  रहग्या
सरदार  भूल्ग्यो  आलिंगन 

राजपूती  मुंह   पीलो   पड्ग्यो 
बोल्यो  रण  में  नहीं  जांवूला 
राणी  थारी  पालकां सह्ल्याँ 
हूँ   गीत    हैत   रा   गांवूला

आ  बात  उचित  किण हद  तांई 
ब्याह  में  भी  चैन  ना  ले  पांवू 
मेवाड़  भले  हो  ज्यावे  दास 
में  रण  में  लड़बा  नहीं जांवू

बोली  या  बात  जचे  कोनी
पति  न  चाहूँ  में  मरवाणो
पति  म्हारो  कोयल  कूंपळ सो 
फूलां  सो  छिन  में  मुरझाणो 

बोली  राजपूतण नाथ  आज 
थे  मती पधारो  रण  मांही
तलवार  बता  दयो  में  जास्यूं
थे  चूड़ी  पैर  रहो  घर  मांही 

कह  कूद  पड़ी  झट  सेज  त्याग 
नैणा  स्यूं  अग्नि  भभक  उठी 
चंडी  रो  रूप  बण्यो छण  में 
विकराळ भवानी  भभक  उठी 

पेल्यां  तो  समझ  नहीं  आयी 
पागल  सो  बेठ्यो  रह्यो  मूरख 
पण  बात  समझ  में  जद  आयी 
हो  गया  नैण एक दम  सूरख

बिजली  सी  चाली  रग- रग  में 
बांध्यो  कवच  उतरयो  पैड़ी
हूंकार  बम -बम  महादेव 
ठुमका  स्यूं  ठुमक  बढ़ी घोड़ी 

पेली  राणी  ने  हर्ष  हुयो 
पण  फेर  जान  सी  निकळ  गयी 
काळजो  मूंह  कानी  आयो 
डब -डब  आँखड़ल्यां  पथर गयी 

घायल  सी  भागी  महलां  में 
फेर  बीच  झरोके  टीक्या नैण 
बारे  दरवाजे  चुण्डावत 
उच्चार  रह्यो  थो  वीर  बैण 

नैणा स्यूं  नैण  मिल्या  छिन  में 
सरदार  वीरता  बिसराई 
सेवक  ने  भेज  रावळ  में 
अंतिम  सेनाणी  मंगवाई 

सेवक  पहुँच्यो  अन्तःपुर  में 
राणी  स्यूं   मांगी  सहनाणी
राणी  सहमी  फिर  गरज  उठी 
बोली  कहदे  मरगी  राणी 

फेर  कह्यो  ठहर  ले  सेनाणी 
कह  झट  खडग  खीन्च्यो  भारी 
सर  कटयो हाथ  में  उछळ  पड्यो 
सेवक  भाग्यो  ले  सेनाणी

सरदार  उछल्यो  घोड़ी  पर 
बोल्यो  ल्य़ा-ल्य़ा  सेनाणी 
फेर  देख्यो  कटयो  शीश  हंसतो
बोल्यो  राणी - मेरी  राणी 

थे  भली  सेनाणी  दी  राणी 
धन्य -धन्य  तू  छत्राणी 
में  भूल  चुक्यो  थो  रण  पथ  ने 
तू  भूल्यो  पाठ  पढ़ा  दीन्यो  राणी 

कह  एड  लगाईं  घोड़ी  रे 
रण  बीच  भयंकर  हुयो  नाद 
कहरी  उठ्यो  चिंघाड़  मार 
'अरि' दल  र  ऊपर  पड़ी  गाज 

फिर  शीश  कटयो  ग ळ  में  धारयो 
बैरी  री  बाँट  बणी  कोनी 
उन्मुक्त  हुयो ,विरक्त  हुयो 
फिर  फौजां  ने  बदळी

सरदार  विजय  पायी  रण  में 
सारी  जगती  बोली  जय  हो 
रण  देवी  "हाडी"  राणी  री 
माँ "भारती"  री  'जय  हो' ,'जय  हो'

मेघराज मुकुल

'आओ, म्हारै कंठां बसो भवानी' -ओम पुरोहित कागद

Rao GumanSingh Guman singh

राजस्थान रजपूतां-रणबंका री खान। पण सारू रण। पण पाळै अर रण भाळै। जीत री पाळै हूंस। हूंस पण स्यो-सगत रो वरदान। इणीज कारण स्यो रा गण भैरूं अठै पूजीजै। मां सगत दुरग रूखाळी। इणीज कारण दुरगा बजै। रणबंका खुद नै सगत रा पूत बतावै। मरूधरा रै कण-कण में रण री छाप। रण री देवी रणचंडी री ध्यावना आखो राजस्थान करै। नोरतां में तो कैवणो ई काँईं।घर-घर दुरगा री पूजा हुवै। सरूपोत में गजानंद महाराज अर सुरसत सिंवरीजै। भळै मात भवानी ध्यावै।



सिमरूं देवी सारदा। गुणपत लागूं पांय।।
सदा भवानी दाहिनी, सन्मुख होय गणेश।
पांच देव रक्षा करै, ब्रह्मा विष्णु महेश।।


एक साल में च्यार नोरता आवै। चैत, आसाढ, आसौज अर माघ रै चानण पख री एक्युं सूं नौमीं ताईं। चैत रा नोरतां नै वासन्तिक नौरता। आसाढ अर माघ रा नोरता गुप्त नोरता। आसोज रा नोरता बजै शारदीय नोरता। नोरता में जगजामण मां भागोती रै सैंकड़ूं रूपां री पूजा होवै। तीन मूळ देवियां- महालक्षमी, महाकाळी अर महासरस्वती। शक्ति रा उपासक आं री ध्यावना करै। शक्ति रा उपासक इणी पाण शाक्त बजै।दीठमान जग रै सरूपोत में बिरमा जी परगट्या। एकला डरप्या। साथ री गरज पाळी। खुद रै ई रूप सूं देवी परगटाई।इण सारू बिरमा अर सगत में राई-रत्ती रो ई भेद नीं मानीजै। महादेवी कैवै- म्हैं अर बिरम सदीव एक हां। बुद्धि रै भरम सूं ई भेद लखावै। इणी जग जामण शून्य जगत नै पूरण करियो। महादेवी यानी महालक्ष्मी देवियां अर देव परगटाया। महालक्ष्मी पैली महाकाळी अर महासरस्वती नै प्रगट करी। भळै आं दोन्यां नै एक-एक स्त्री-पुरूष सिरजण री आज्ञा दीवी। खुद बिरमां अर लक्ष्मी नै सिरज्या। महाकाळी शंकर अर त्रयी नै। महासरस्वती विष्णु अर गौरी नै। पछै आपस में जोड़ा बनाया। शंकर-गौरी, विष्णु-लक्ष्मी, बिरमा-त्रयी(सुरसत) रा जोड़ा बण्या। भळै बिरमां अर सुरसत जगत रच्यो। विष्णु अर लक्ष्मी जगत नै पाळ्यो। शंकर अर गौरी परळैबेळा में जगतसंहार करियो।महालक्ष्मी-महाकाळी अर महासरस्वती ई नौ देवियां परगट करी। शैलपुत्री, ब्रह्माचारिणी, चंद्रघंटा, कूष्मांडा, स्कन्दमाता, कात्यायनी, कालरात्रि, महागौरी अर सिद्धिदात्री। आं रा दूजा रूप है-चामुंडा, वाराही, ऐन्द्री, वैष्णवी, महेश्वरी, कौमारी, लक्ष्मी, ईश्वरी अर ब्राह्मामी। नोरतां में इणी नौ देवियां री पूजा देवी भागवत मार्कण्डेय पुराण अर दुर्गासप्तसती में बताई विधि मुजब नौ दिनां तक होवै। पैलै दिन केश-संस्कार। दूजै दिन केश गूंथण-संस्कार। तीजै दिन सिंदूर-आरसी संस्कार। चौथै दिन मधुपर्क तिलक संस्कार। पांचवै दिन अंगराग-आभूषण संस्कार। छठै दिन पुष्पमाळा संस्कार। सातवैं दिन ग्रहमध्य पूजा। आंठवैं दिन उपवास अर पूजन। नौवैं दिन कुमारी पूजा। कुमारी कन्यावां नै जीमाइजै। दसवैं दिन पूजा करणियैं री पूजा अर जीमण, दान-दखणां। नौ रातां ताणी एकत करै। इणी कारण ऐ नौ दिन नोरता बजै।
============== 
नोरतां रो पूजन विधान
==============
पैली घट थापना होवै। बेकळा री वेदी थरपीजै। वेदी में जौ-कणक रा ज्वारा बाईजै। इण माथै सोनै, चांदी, तांबै या माटी रो कळसियो धरै। कळसियै माथै देवी री फोटू लगावै। फोटू ना होवै तो कळसियै रै लारै साथियो। असवाड़ै-पसवाड़ै त्रिसूळ। पोथी या साळगराम धरै। पैलै नोरतै में स्वस्तिवाचन अर शान्ति पाठ कर'र संकळप लेईजै। भळै गणपत, षोडष मात्रिका, लोकपाळ, खेतरपाळ, नवग्रह, वरूण, ईष्टदेव री ध्यावना करै। प्रधान देवळ री षोडषोपचार सूं पूजा होवै। अनुष्ठान में महाकाळी अर महासरस्वती री पूजा होवै। नौ दिन तक दुर्गा-सप्तशती रा पाठ करै। नौ रातां दिवळो चेतावै। आधीरात, भखावटै अर दिनूगै जोत करीजै। सम्पदा चावणियां आठवैं दिन अर आखी धरती रै राज री मनस्या राखणियां नौवैं दिन माताजी री कढ़ाई करै। कढ़ाई रै दिन कुमारी पूजन होवै। कन्यावां नै देवी मान पग धोय'र गन्ध पुहुप सूं पूजा करियां पछै जीमावै। चूनड़ी-गाभा भेंटै। नोरतां में कन्यावां री पूजा रा फळ बखाणीजै। एक सूं एश्वर्य। दो सूं भोग अर मोक्ष। तीन सूं धर्म अर्थ अर काम। च्यार सूं राज्यपद पांच सूं विद्याङ्क्तबुद्धि। छै सूं षटकर्म सिद्धि। सात सूं राज्य। आठ सूं सम्पदा अर नौ सूं पिरथी री प्रभुता मिलै । दस वर्ष सूं कम री कन्यावां न्यारी-न्यारी देवी मानीजै। दो बरस री कन्या कुमारी। तीन बरस री त्रिमूर्तिनी। च्यार बरस री कल्याणी। पांच बरस री रोहिणी। छै: बरस री काळी। सात बरस री चंडिका। आठ बरस शाम्भवी। नौ बरस री दुर्गा अर दस बरस री कन्या सुभद्रा या स्वरूपा बजै।